Poesikveld på Frie Kunster
Fredag 14. mars 2008
Frie kunsters litteraturscene får fredag 14. mars
kl. 20.00 besøk av den belgiske diktaren
Luuk Gruwez.
Gruwez (fødd 1953 i Kortrijk) blir av
mange halden for den største nederlandskspråklege samtidspoeten i
Belgia. Han høyrer til den nyromantiske retninga i nederlandsk lyrikk,
eit straumdrag som atter rettar merksemda på dei store tema: livet,
kjærleiken, det forgjengelege og døden. Men Luuk Gruwez' poesi sprengjer
grensene for periodar og inndelingar i litteratursoga. Versa hans er
like nådelause som dei er romantiske. Gruwez syng gripande om sitt grå
Belgia og står i samband med tidlegare flamske diktarar som Maurice
Maeterlinck, Émile Verhaeren og Jacques Brel. I år er Gruwez aktuell med
boka Lagerwal som har fått ros av kritikarane i belgiske og nederlandske
aviser.
Ved inngangsdøra bed vi om ein liten entré på kr. 50,- som inkluderer
inngang og ein nyutgjeven publikasjon med tolkingar av poeten til norsk
og ein artikkel om nederlandsk samtidspoesi.
I tilknyting til opplesingslokalet har Frie Kunster ein restaurant, Café
Art´é, med fulle rettar og italiensk kjøken.
Vi ynskjer dykk hjartans velkomne til atter ein triveleg kveld på Frie
Kunster.
Arrangementet er ved Senter for Frie Kunster, Café Art´é, Ronny Spaans,
Håkan Sandell og Norsk Kulturråd.